Bileta i utstillinga er frå arbeidet med jakta Brødrene af Sand som blei restaurert ved HFS i åra 1997-1999. Brødrene af Sand er ei ryfylkejakt på 50 fot som truleg blei bygt på Jelsa i Ryfylke i 1860-åra. Fartøyvernsenteret sitt oppdrag gjekk ut på å tilbakeføra Brødrene til seglfartøy med 1905 som referansetidspunkt.

Kva er restaurering? Utgangspunktet når ein restaurerer er at det skal takast vare på mest mogeleg av den originale materialen, men på same tid må krava til styrke og levetid stettast. Alle deler som blir skifta ut skal erstattast av deler med same utføring og materialkvalitet. Alle løysingar skal vera baserte på innsamla dokumentasjon. Også sjølve restaureringsprosessen skal dokumenterast med bilde, skisser og rapport.

Eit restaureringsprosjekt involverer mange faggrupper, og resultatet er avhengig av godt samarbeid og dyktige fagfolk i alle ledd. Dei fleste funksjonar er dekka inn ved eigne stillingar på Fartøyvernsenteret, men vi er også avhengige av underleverandørar.